بقلم: ربا سمّور Ruba Sammour
جملة تقال كثيراً وأحياناً يومياً إذا واجهنا موقف ما عجبنا... أحيانا هذا الموقف يكون نتيجة لتصرف خاطئ منا... بس برضه يلعن أبو حظي..ز
والعكس صحيح إذا حدثت أمور جيدة نقول "حظي حلو اليوم" أو على رأي ابني باسل "حزي اليوم حلو"
مثلا لنستعرض بعض المواقف التي نقرر بناء عليها أن حظنا في هذا اليوم زي الزفت:
- انتظرت تكسي لمدة طويلة وشوبت وعرقت واتعاكست بما فيه الكفاية
- اتمرمرت وانت تفتح الكاتشاب لانه باعتبارنا لو حظي حلو كان وصلني الباكيت السهل الفتح
- طولت بمرحلة كاندي كرش او ضايل الك حركة وحدة بس خلصوا الحركات (مع إنه بتكون ضيعت فرص كتير)
- وقعت القهوة عليك (مع إنها ممكن تكون عريس )
- كاسة الماء اللي بالمطاعم ومشكلة فتحها (بغض النظر انه 99% منهم ما بيفتحوا طبيعي) بس برضه سببها حظي الزفت
- راس العبد اللي أحيانا تحتاج لمفتاح أو بكلة شعر أو سكينه أو أي أداة تساعدك لفتحها
- المحاية اللي بمقلمة الولد او مقلمتك لما تمحي فيها ويتحول البياض إلى سواد (اجت تكحلها عمتها)
- بري قلم الرصاص (ويا ويلي على بري القلم وخصوصاً لما توقع الفعطة بس تكمل بري او يصير بويز بالخشب بس بلا فعطة )
- يفصل الكمبيوتر بعد ما تكون متت وانت بتطبع مع انه مية مرة حكينا احفظ اللي بتكتبه ... بس برضه هاد مرجعه حظي الزفت
- ينحرق الكيك (بغض المنظر انه نسيناه او الحرارة عالية)
- ترجع تشتري بلوز او بنطلون بطلع مبيوع (برضه بغض النظر انه أصلا انت ما اشتريته قبل لما عجبك)
- تبعت مسج او واتساب بالغلط (هاد نصنفه ضمن سوء حظ وليس عدم تركيز)
في مواقف أخرى وكثيرة وتربط دائماً بالحظ... وهنا يتم وصف الحظ باكثر من طريقة مثل:
حظي اليوم زي اللي بإجري... لا بجوز اللي بإجري حتى احسن منها
خ... على حظي
حظي متل الكندرة
حظي زفت معمعم
حظي خ... مصبَّر
قدر ومكتوب
انت وحظك
تخلص من حفرة تقع بدحدورة
ييي بعطي اللحمة للي ماله سنان
ومن النكت حول الحظ:
لو عملوا جائزة لأكتر بني ادم حظه زفت بالدنيا راح أموت بحادث وأنا رايح أخذها !!
وبالنهاية هنالك مثل شعبي مهم جدا " اللي ما اله حظ لايتعب ولايشقى
