بقلم: ربا سمّور Ruba Sammour
كيف بقدر أنسى مشيك كل يوم الصبح للمدرسة بالشتا... كيف بقدر أنسى ترويجتك الظهر من المدرسة مشي ... والشمس بتمزمز عليك... وبتتسلى وبتضحك عكل نقطة عرق بتنزل منك... حرمت حالك من كل شي لأجلنا... حتى أبسط الأمور... أمور كتير بسيطة بحياتنا ما انتبهنالها واحنا صغار... بس هلأ لما كبرنا وصرنا أمهات قدرنا كل شي بتعمليه... هلأ ببكي بس اتذكر تعبك كل اليوم واحنا بغرفنا بنمارس هواياتنا... هلا ببكي لما بتذكر حرمانك من اواعي جديدة بالعيد وإحنا بندور على أحلى وأغلى لبس لنشوف حالنا فيه... هلأ ببكي لما بتذكر انتظارك إلنا كلنا لناكل وانت جوعانه وإحنا بناكل على مهلنا... هلا ببكي لما بتذكر تعبك وانت عم بتطبخي وانت مروحة من الدوام وإحنا بنتأفأف عالطبخة... هلأ ببكي لما تترجينا مابتقدري تتطلعي من التعب وإحنا بكل سخافة ولامبالاة بنجبرك تطلعينا ونغير جو... إشياء كتير ببكي عليها وبتأسف إنه كنا هيك... بس والله والله والله ياماما ما كنا بنعرف وبنقدر هالأمور ... ياريت كنا أنضج وأوعى شوي
ماما صدقاً ماعم بلاقي كلمات توفيك حقك... توفيك تعبك وسهرك وعرقك... غير الله يحميلنا ياك يا أغلى وردة بحياتنا... يا أغلى انسان عقلبي...وعلى قلبنا كلنا...
ماما ديري بالك عحالك مابقدر عالحياة بدونك
http://www.youtube.com/watch?v=32zjfSUMI3A
ليست هناك تعليقات:
إرسال تعليق